हमर सिंगार पहिनावा के सुध ल छोड़ देहे
कइसे दूसर के जिनिस ल अपनावथे
का होंगे ये जबाना ल ग मंगलू
संस्कृति सभ्यता सबे हर नदांवथे
नानुक मनखे घलो उचपुल बनथे
गोड दु बीतता छोटे परथे काते
गाय भईस कस खुर लगावथे
अतेक सुग्घर मुँहू म मिट्ठू बरोबर
लिबिस्टिक ल छप छप ले रंगावथे
मालिस करे बर तेल कम होथे
आनी बानी के किरिम पाऊडर ल लगावथे
का होंगे ये जबाना ल ग मंगलू......
बारह हाँथ के बम्बई लुगरा छुटगे
सलवार संगे म दुपट्टा छुटगे
अऊ छुटगे लहंगा संग चोली ह
हाँथ भर ककनी बनुरिया अईठी छुटगे
अरे ओन्हा बर बिखारी कंगाल होंगे
देख तो फेसन में अब अम्मर झम्मर
आनी बानी के चेन्द्रा कस ओरमाथे
का होंगे ये जबाना ल ग मंगलू......
घेंच म छपछप ले पहिने सुतिया ह
तन भर के जेवर मोटरी म बंधागे
कनिहा जांग ले ओरमे चुंदी के फुंदरा ह
पोलखा में फिटिंग झूल धरागे
अब तो माईलोगन के खिनवा बाला ह
टुरा मन बर पुरखौती जेवर कस जोंगाथे
का होगे ये जबना ल ग मंगलू.....
छाती ठोक कहिथव रे मैहा
छत्तीसगढिया हव खा जाबे तै धोखा
दु मिंट म तोर जीन्स पहिरहव
पन्द्रा मिंट लेले अऊ धोती पहिर के देखा
लुहँगी गमछा ल पागा बाँधे बर भूलाथे
अऊ फूल पैंठ ह पिररी ले टँगावथे
का होंगे ये जबाना लग मंगलू.......
अजयशेखर नेताम 'नैऋत्य'
No comments:
Post a Comment