जगा-जगा फटे बदल फट गई प्हाड़ियां
टुट गए सड़कां-पुल रूढ़ गई गाड़ियां
जल परलै रच गई नौंई कहाणी।
उच्चियां धारां पर...
बेघर हुए माहणु और पालतू डंगर
जगा-जगा लगे हैं टैंट और लंगर
किंयां इन्हां लोकां एड़ी जिंदड़ी बिताणी।
उच्चियां धारां पर...
कच्चे प्हाड़ सुरंगां ने कोरिते
फोरलेनें ये तो नंगे ई करिते
चो-खड्ड-दरायो मलबे ने भरिते
नदियारे कंढे गांव शैहर बसाईते
तांई सिरा गासिएं लंघिया पाणी।
उच्चियां धारां पर...
जंगलां रे कटणे रा है ये नतीजा
दे रई ग्लोबल वार्मिंग इसदी सजा।
इक दिन बड्डी तला-डोब होणी
डुब्बी जाणे शैहर सारे महापरलै होणी
फिर कट्ठयां ई डुबणां कट्ठयां ई तरना
संग-संग होणी खत्म कहाणी
सौगी-सौगी होणी खत्म कहाणी
उच्चियां धारां पर...
- डॉ. अनेक राम सांख्यान
No comments:
Post a Comment