बात बाळपण री है
म्हं टाबर हो
पोह अर माघ रै माह
जाडो घणों पड़तो
नाक चालतो दांत बाजता
धरती धौळी होंवती
आकड़ा तक बळज्यांवतां
न्हावण रै नावं सूं धूजता
फुरसत अर अदितवार रै दिन
न्हावण रौ ओपतो मुहुर्त होंवतों
भींत री ओट मां पाटों झलाती
म्हें धूळ माटी सूं खेलता
अघोरी बाबा बण्यां फिरता
मां पकड़ जट पाट'अ पटकती
म्हाने नंग धडंग
बाखळ बिचाळें
मां न्हावंती
म्हें नागा साधु बरगा लागता
बळबळता पाणीं सूं
मां न्हावंती
भाटा री टिकड़ी सूं
काया रौ दाळद(मेल) उतारती
मां म्हारें तेल रौ चौपड़ करती
ठोडी पकड़ पटा बाती
जट्टा रौ बुगो करती
माथा माथे काळों टिकों करतीं
आपरै हाथ दूध पिलावंती
रोटी रौ चुरमों बणाय खिलावंती
मां रै हाथ त्रिवेणी बैंवती
आजै जद बाळपण याद करूं
मां रै हाथ रौ न्हाण
आज रै महाकुम्भ सूं सवायो लागै।
- जितेन्द्र कुमार बोयल
No comments:
Post a Comment